نتكلم شويه عن الثوره الي ضاعت منا والناس كفرت بيها وبقوا يقولوا ربنا ياخد الثوره علي الي عملها تعالي نتكلم بعقل ونشوف فوائد الثوره
الثوره رجعت الامل ل الشباب تاني بعد ما كان كلوا فاقد الامل وكل الشباب كانوا بيتمنوا اي فرصه عشان يهجوا من البلد حتي لو هيموتوا وهم بيحاولوا
قبل الثوره كانت منظمات المجتمع المدني شغلها كلو خيري وبيكون شغل علي الضيق ومش كبير بسبب الملحقات الامنيه عشان ميظهرش اد ايه فشل الحكومه وعشان الحزب الوطني يستغل فقر الناس ف الانتخابات
والحمد لله بسبب الثوره خلصنا من الملحاقات الامنيه وفتحت المجال ل جمعيات زي صناع الحياه ورساله وغيرهم يشتغلوا بحريه من غير ما حد يوقفهم او يمنع شغلهم
والشباب كتير انضم ل الجمعيات دي عشان عاوز يخدم البلد ويخدم الناس ويحاول يغير ويخرج الطاقه والابداع الي جواه ف الجمعيات دي
شباب كتير بقي همه البلد ومتابع اخبار وبقي يتكلم ومش بيخاف وبيعبر عن رائيو وبحاول يطور من نفسوا ويستفيد عشان يفيد البلد دي
وشوف اد ايه شباب بقت تعمل افكار مختلفه لخدمه البلد ورسمه فرحه وبسمه علي وشوش الناس وشوف كام شاب بقي يقرا بعد الثوره
الثوره رجعت ل الناس حب البلد دي والدليل ان كلوا بقي يتكلم ف السياسه وكلوا بقي بينشغل ب الاحداث الي بتحصل ف البلد من مظاهرات او انتخابات
ومثلا بيهاجموا المظاهرات عشان حاسيين انها هتضيع البلد او بيشتمو ف الاخوان عشان حاسيين انهم مضيعين البلد فده دليل ان الناس خايفه علي مصر
قبل الثوره كان الناس عارفه ان مبارك عمل مصايب او اي حاجه يقولوا هي بلدنا خليهم يعملوا الي عاوزينوا بس دلوقتي الاحساس اتغير
خليك متفائل واحمد ربنا ع التغير الي عملتوا الثوره احنا ضلينا الطريق شويه بس هنرجع باذن الله ونشوف مصر الي حلمنا بيها ساعه الثوره
وقبل ما تغير ف البلد ابدا غير من نفسك وابقي انسان كويس وهتلاقي بعد كده البلد كلها بتتغير وتبقي كويسه بس الاول ابدا بنفسك انت
ليست هناك تعليقات:
إرسال تعليق